Ma goht ja manchmol furt, schdeckt da Schlissl nei en's Schloß
Ond end' Hosadasch a Feier ond a Geld.
Des hot sich halt bewährt weil ma bleibt ja koin Woch weg,
Ond i glaub so machat's viele auf dr Welt.
Mancher braucht sei Handy - oder moint's auf jeden Fall,
Bloß wenn i weggang no schwätz i gern direkt.
I ben's halt jetzt so gwehnt, s'piepst eh scho überall
Bloß weil vor am schwätza koiner überlegt.
Fraua hen's do oifach mit ihre riesa Dascha
Ob aus Leder oder Plaschdig oder Schdoff.
Was do so älles neigoht, han i oft überlegt:
Isch ma nosaweiß wird d'Reaktion moischt schroff:
"Des goht Di gar nix oh, des verschdosch du net als Mo!
I brauch des älles, irgendwann, beschdimmt!
Beschdimmt net glei, au morga net, ond donnerschdags vielleicht,
Doch wann i's brauch, no han i älles do:
Handdascha - Do goht an Haufa nei
Handdascha - Net bloß dr Führerschei
Handdascha - Des brauchsch auf jeden Fall
Handdascha - Drom hen ja d'Fraua rode, greena, blaue überall.
Zwoi Lippa- ond oin Klebeschdift, do schdoht no drauf: "Zwoi Mark."
Der isch zwar scho a weng versifft - zom Glück bloß Kräuterquark.
Den hot se mit em Krangahaus, den schmeißat's doch bloß weg.
So wie's Babier vom Bloamaschdrauß, glei neberm Euroscheck.
Vom Geggale s Erfrischungsdiachle, ha des braucht ma gwieß.
Ond neber dem Adressabiachle a Boschdkart aus am Ries.
An Kuli aus dr Abodehg, der schreibt beschdimmt no guat.
Drneber hot se nommel oin, falls erschderer net duat.
Oin Kaugu- ond fenf Hoorgommi, do hangt no ebbas dro!
A Eitrittskart vom Pur-Konzert, zu sowas goht dia no.
Vom Kenderfeschd an Pfandbeleg, jaja, do liegt er guat.
A meichligs Tempo mit ma Fleck von Schmingge oder Bluat.
Des Schlissale wo koiner woiß, für welches Schloß der isch.
A Wegga ond a Serviett, der war vor zea Dag frisch.
Dr Durchschlag vom ma Loddoschei, mit sowas gwennt ma net!
Au wenn se'n dann no fenda dät, wär's gwieß scho viel zu schbät.
Chor: So riesa Dascha do, braucht ma net als Mo
Was isch denn des, was liegt denn do, isch's ebbas aus Hawaii?
Ond wenn's koi alda Quarkdasch isch, wird's hald was anders sei.
An alda Hond mit Erbsa gfüllt ond Breschdleng für a Gselz:
Nix gibt's, was do net dren sei kennt. Hauptsach dr Henkel hält's.
Mir Männer brauchat sowas net, do wirsch doch bloß verrickt:
"Woher hosch Du dia Super- Dasch?" "Han i zom vierzger kriegt!"
"Die basst au farblich zu dr Hos ond drecht drbei net auf."
"Isch se von Gutschi oder Boss, do schdoht ja gar nix drauf!"
"Dia hot se glaub beim Aldi gholt, glei mondigs en dr Friah.
Ond hot beschdimmt zur Nochbre gsagt: "So ebbas merkt der nia!"