Sa buhay ng tao ay normal lang naman sumabit
Kung sumabit ka, sana naman 'wag nang gumamit
Pipilitin ngumiti kahit halatang balisa
Pakiramdam mo ikaw ang palaging nasa gitna
Maya't maya ang iyong tingin sa iyong kanan at kaliwa
'Di makatulog kahit maghapon ka nang nakahiga
Tipong 'pag kargado ka, 'di ka pwedeng mabigla
Matapik ka lang ng konti, ika'y ready mandigma
'Di ba tama kung iisipin 'di astig ang tama?
'Di na nga tama nangyayari gumagawa ka pa ng 'di tama
Maling-mali 'yan at kailanman 'di magiging tama
Ang magiging tama mo lang d'yan, tamang hinala
Kahit anong hithit mo d'yan walang hiwagang mangyayari
Maniwala ka mas lalo lamang lalala 'yan, pare
Wala, wala, wala, walang mapapala
Mas lalo lang 'yan lalala 'pag hindi ka nakawala
Sinalakay ng QCPD Station 6 ang isang bahay
Sa Sitio Kumunoy, Bagong Silangan, Quezon City kagabi
Ito'y matapos magpositibo ang kanilang impormasyon
Kaugnay ng ilegal na droga
Arestado si alias Otet na nakunan pa
Ng ilang sachet ng shabu at mga paraphernalia
Dose anyos na batang babae, nagbebenta ng puri
Sa mura niyang edad, ang dami na niyang suki
"Bakit mo ginagawa yan iha?", "Para kay mama"
"Para hindi na sila mag-away pa ni papa"
Anong klase kang magulang, kinaya mo 'yon?
Sabog ka! Habang anak mo hinahalay doon
Tama na tulog-tulugan, gumising na kayo
Ginagawa niyo na lahat, makabili lang ng shabu
Pagnanakaw, panghoholdap at pangbubugaw
Ba't giyang na giyang na ang mundo parang gugunaw?
Ubos na ang mga ngipin at ang lalim na ng mata
'Di ka ba pwedeng kumalma, bakit ka laging taranta?
Pa'no na 'yong mga anak niyo 'pag nagka-tokhangan?
Makikita kayong may karatula na 'wag tularan
Alam kong kaya niyo pa, kaya niyo pang lumaban
May plano ang Diyos sa inyo, 'wag niyo lang pangunahan
Sa isang gabi po, sampu na mga lalaki customer ko
Ang kinikita ko po, binibigay ko po sa papa ko
Nag-aaway po sila dahil sa shabu
Nag-aano sila sa pera para pambili ng shabu
Nakukulangan pa sila
Bakit kailangan mong magtrabaho sa ganitong paraan?
Para po magkaroon ng pera pambili ng shabu
Binulag ng kaaway ang iyong paningin
'Di mo nakita ang liwanag, masyadong madilim
Ika'y lumapit, inakit sa umunoy ng kasalanan
Habang nagkakasiyahan 'di mo namamalayan
Na ikaw pala'y nasa puder ng kasamaan
At wala na silang balak pang ika'y pakawalan
Lalong 'pag kinapos at naghikahos, lapit sa Diyos
Dahil ang pag-ibig niya sa atin ay laging taos
Aming Amang hindi mapanghusga, kailangan kita
Tulungan po ninyo akong maisalba sila
Ang buhay ay umiiksi, hindi yan humahaba
Lahat tayo tumatanda, hindi ka bumabata
Mahirap ang buhay kung iisipin mong mahirap
Kaya kahit tinatamad, pipilitin kong magsikap
Kahit anong sitwasyon basta tama ginagawa mo
'Wag matakot sa mga sasabihin ng ibang tao sayo