E' l'arba
E sugnu davanti o mari
A scriviri e pinzari
O misteru da vita e da natura
Ca mi mpidisci di sapiri
Cu sugnu
Di Unni vegnu
E chi vinni a fari nto munnu
Ancora un sacciu
Chi è a carni
L'ossa
I vini
U sangu
E i miliardi di celluli
Chi nascinu e morinu
E mi fannu cantari
Un sacciu chi è a vuci
Si resta spersa nni l'aria
O nna portamu cu l'anima
E si fu omu, animali
Diavolu o santu
Cu nna detti prima
E nni nzignò a parrari
Un sacciu cu fici u Cielu
Unni pighhiò i culura
U punzeddu
E si pi stanchizza si scudò
Di signari i limmiti
E un sacciu mancu
Cu quali arti e misteri
Pittò i muntagni chi Petri
Ca cancianu forma e apparenza
Tutti i voti ca taliàmu
U misteru è puisia
È u chiù granni sognu
Fa bella e ricca a vita
E dura di sempre
E io ci campu dintra
Filici di ci essiri
Si sugnu cca all'arba
Davanti u mari
A scriviri e pinzari
Senza sapiri pirchì u fazzu
Cu mu fa fari
E si servi fallu
CCa a pinzari ca semu cincu miliardi
E semu tutti diversi
Diversi di gesti
Di figura
Di mmagini
Di impronta
E di curaggiu
Diversa a taliata
U projiri e u riciviri
U chianciri e u cantari
L'amari e u disamari
Nuddu e nudda
Ora e mai
Fu ed è
Di corpu uguali e pricisa
Di nàutru e di nàutra