देवा राज़िया
तेरे ड़ा पितलू पिड़े!
शाउणा छैंइया देइया ज़ातरा
सूना रा देइया च़ोलटू भिड़े!
♪
आ राज़ै गाउ साबौ रे सूनै रे पागौ!
बिजो पौड़ो इंदरौ लागे मुल्कौ दे आगौ!
♪
ओ इया मतल़ोगा बोठा नौं गरौआ!
डाल़े शूके पाउल़े देवा बौंदे ना नौआ!
♪
ए लिखे दैयौ कागल़े है नरोल़ौ रे राणे!
केज़ा लाऔला देबता सै इंदरौ खू पाणे!
♪
ओ राज़ा शेरसिंगै देवा हुकमौ पाए!
केज़ा होला देबता पाणे ज़ू हेड़ौला ला लाए!
♪
एबे टिबै पूछ़ौ टिबै रै तुयै बाएणै काली!
सौबी पूछ़ौ ठारी सौबी़ देबतै रै माली!
♪
ए सुंगरा महेष्रौ पुछ़ौ ज़ाबल़ा नरैणौ!
सौरगौ रे खौबरौ केज़ा दैयौ दोषे ज़ाणौ!
♪
आ सुंगरै रा महेष्रौ दैयौ चोड़ियौ ज़वाबौ!
सौरगौ री च़ोकी बोठा नाउरौ रा नागौ जय हो!
♪
ए दैयौ लाऔ बसारू सारै मुल्कौ रो ठेयो!
ज़ौल़ौ री च़ोकी बोठा गोल़ी नागौ दैयौ!
♪
ओ ज़ैबै लाऐला साईबा इंदरौ खू पाणे!
रोहडू टेकिलै ज़ातरौ तेरे बारी रे निशाणे होरकीया!
♪
आ बिजै दिणे सौरगै देवै बादले आणे!
लाए हेड़ो गोलि़या नागा इंदरौ खू पाणे!
♪
पाणे हाथौ पाइयौ रूऔला देवा धौना दौफादारौ!
जाऔ लाणे ज़ातरौ नागौ रे रोहडू बज़ारौ!
♪
आ सौंतुआ सपाईया छ़ौंउ नाउरौ खी जाए!
इंयौ दैला काग्ल़ी कशैणी पौंच़ाए!
♪
ओ ज़ेलदारै च़ेउरियै बांच़णे लाए!
राज़ै रे काग्ल़े गोल़ी नागौ खी आए!
♪
आ सौंतू सपाए गोआ रोहडू खी जाए!
बांच़े बूंच़े काग्ल़े हेड़े कोठी दे दबाए!
♪
ओ ज़ेलदारौ च़ेउरे कौरौ नरैणु रो धौड़ो!
केज़ो होलो दैयौ राज़ै इंदरौ खू बौड़ो!
♪
एबे पाए हेड़े बिज़ले कौरो चुकनै च़ारौ!
शिकू हांडौ नेगे देवा च़ारी कनारौ जय जय!
♪
आ गोपू रे शाढ़े ढाल़े च़ेउरी रो सैयौ!
ध्यैन सिंगौ रै चि़लमौ रो लाओ बी ना ठेयो!
♪
ओ तेरी कशैणी होलो चि़कनो माटो!
एज़ो होइगो भाईयौ गोल़ी नागौ रो ख्वाटो!
♪
ए ओतरा नरैणू ज़ाणी सूना रा धागा!
एज़े खुंबल़े थाटा आफी भाए गोल़ी नागा जयकार!
♪
आ शिकू लाऔला नेगे पुच दारखो टोपो!
जिशी छ़ाढू पज़ैरली छ़ौंउ च़ेउरे गोपू!
♪
ओ च़ेउरे ओ गोपू नागौ टैलि़दै लागौ!
धौनुआ सणैसिया लाऐ दैयौ खै पागौ!
♪
छबीया रै मुखिया हेड़ै बोदियौ आणै!
नागौ री पज़ैरली सेज़े खूंबल़े चाणे!
♪
आ छबीया रै मुखिया होलै पाणी रे फणैरे!
शीगे शीगे कौरिलै दादा रोहडू रे त्यैरे!
♪
ओ घिटका पूरू बोलौ च़ारै बिच़ारै!
नौंवै लाइ च़ोल्टू नौंवै गाड़ी नगारै होरकीया!
♪
ए कुपड़ी खलाउनौ पौड़ै नागौ रै तांबू!
ठारा बिशौ नाउरौ टेका पाणी रा लांबू!
♪
आ देखै मेरी पौरज़ा मेरा रोहढू रा साटा!
च़ांबी कोटौ री काल़्का झ़ाड़ी लांकड़ा लाटा!
♪
ए खौड़वा रोहडू ज़ातरौ नागा कुखडू री बाच़े!
सूनै रै च़ोल्टू कौशै च़ांदी रे गाचे!
♪
आ पुजे गोआ ज़ेठुआ ऐबै टिक्करी सज़ारौ!
दिणो भाईड़ै रूदड़ै ताखी च़ांदी रो नगारो जय हो!
♪
नगारो ज़ोड़े दिणे नगारै रे साथी आपड़ा ढाके!
रोहडू लाउला बाज़ियौ आंऔ आपड़े फाके!
♪
आ ढोल बाज़ै काउल़ी धामै पोगौ करनाल़ी!
इणो पाओ पुचै ज़ुल़्कू गौंउ झ़ौड़गौ तदाल़ी होरकीया!
♪
आ सौरा गौरी जुबड़ी बाज़ै ज़ोड़ी धरागौ!
ज़ाणौ समरैरे एयो हुंगरो बरागौ!
♪
ओ लांगे हेड़े ज़ेठुआ ऐबै तौं फेल्ली रे गाड़ौ!
अढ़ाल़े आऐ ठाकरौ भांगौ बाथू रो बाड़ौ!
♪
ए सौंवे समोल़े दिशे रोहडू रे दसीला!
बासा गंगटोली रा दिशा राज़ै रा किला!
♪
आ ओतरौ शिकढू दाड़ो पाथटू भानौ!
आपड़ी कुपड़ी कौसी देबतै ना मानौ जय हो!
♪
ओ राज़ै ठकरैई री कौरी रैस्ती बांगी!
देबतै नीरै री मौंऐ कुपड़ी लांगी होरकीया!
♪
आ देखौ मेरे पौरच़ा आई किणो किणो कौरू!
ल़ोटी भौरू रोहडू री ठांडै पाणी रा च़ौरू!
♪
ए तांबू पौड़ै दैयौ रै ऐबै राज़ै री ल़ोटे!
राज़ा शमशेरौ रे गोए ज़ातरौ बोठे!
♪
आ दैयौ गोआ गोल़े नागौ सौरगौ बोठे!
ताल़ी कूंज़ी सांबल़ी खोले पाणी रे कोठे!
♪
ए च़ोउ दिशौ खू नगेश्रै गोए बादले आणे!
लाए हेड़ो ज़ेठु गोलि़या नागा रिमझि़म पाणे जय जय!
♪
ए हाथा पाइया औरज़ा कौरा दौफादारा धौना!
खुशी नाच़ै गोलि़या नागा तू कुशल़ा मौना!
♪
आ रोहडू री दसीलौ लागी ज़ातरौ बेगी!
झुई तरारियै नाच़ौ हुमानौंदौ नेगी!
♪
ए रोहडू री दसीला नाच़ा हाकमा नीरा!
झुंई तरैरियै नाच़ा च़ेउरे बज़ीरा!
♪
आ धारौ नाच़ौ धारौ रै ताखी बाऐणै काली!
रौथू नाच़ा पुज़गे देवा बुद्धिरामौ माली!
♪
आ नोखी लागी ज़ातरौ देवा रोहडू रै बज़ारौ!
ठारा बिशौ नाउरौ ढौल़ो च़ौतरौ च़वारो जय हो!
♪
ए छ़ाैंउ खौड़वा राज़िया टेका मावी रै करासै!
गोपू च़ेउरे जनारटै तांऔ आशौलै पाछ़ै!
♪
आ बुद्धिसिंगै तेगटै दिणा बाकरा भरौए!
आज़ बैल़ी गोलि़या नागा एथियै रौए जय हो!
♪
ए बौरे तेरा बाकरा लोगा पांदा नै खांदा!
एती उबा कोटी भाए रूदड़ौ री जांदा!
♪
आ भोपसिंगौ ओ जैह्ढू फिरौ दैयौ रै बकीलौ!
गाड़ौ भाइड़ौ रूदड़ौ मेरै कौरणे मिलौ!
♪
आ भोपसिंगौ जैह्ढू फिरौ दैयौ रै बज़ीरौ!
शुने गाड़े पौलगे नागौ सामनै ना फिरौ!
♪
ओ धैन देइयै माटियै दैयौ रूदड़ौ रो सौतौ!
शुनी आपड़ी पौलगी ढाल़ै काली रै रौथौ जय हो!
♪
छबीया रै मुखियै होलै भौजौ रे नौंए!
एज़े गोए ढिणके खुंदौ खौशियै रै रौए!
♪
आ छबीया रै मुखियै तुयै कौशे कौरौ दैयौ!
दैयौ री रैती आगू लाइयौ बी ना ठेयो!
♪
ओ मुखिया भडारे गोऐ घौरौ खी आए!
आपू गोआ राज़ी गोलि़या नागा मौउलौ खी जाए!
♪
ए दैयौ गाड़ौ गोलि़या नागौ बुशौ रा पांगा!
झुठे लाए मुंदे छि़बता मेरै नैउणे गांगा!
♪
आ नागौ री पज़ैरली ऐबै खुंबल़े चाणौ!
मुखिया भडारे बादै बोदियौ आणौ!
♪
ए औन कौरौ पाणी साथी सिस्सू समानौ!
सूनै भौरौ च़ांदियै गोल़ी नागौ रो खज़ानो!
♪
आ सैंएरामौ सुंटै बोदौ काठे संग्रेलौ!
इदरौ कू लागौले खुंदौ खौशियै रे मेलौ होरकीया!
♪
ओ सैणै बोदौ ज़ालमू गाशौ कूंभी धराल़ौ!
हांसटू धैणोटू बोदौ खुंदौ पकशाल़ौ!
♪
ए नेगी बोदौ ज़ोबणेदासौ काइतौ गज़ैणौ!
मुखिया धणोटी रा बोदा नेगे नरैणौ!
♪
आ नेगे नरैणिया दासौ थाटियै फिरौ!
किथौ आशा घिटका पूरू दैयौ रा बज़ीरौ!
♪
ओ पुरू आऔ घिटका देवा दांकणे बाए!
हुकमौ रे ज़ौणा मेरे खुंदौ पांज़ गांए!
♪
आ बेटो बाल़ेनौंदौ रो आओ औसरी बनेरो!
गौटी पाइलै शाकरी देवा चौपड़िलै तेरो जय जय!
♪
एबे एक नोटे आदमे पोरू देउरी जाए!
नाथौ तेस हौरियै कौरौ ओरू बदाए!
♪
ए नाथौ आशा हौरिया गौल़ै फेरौला कांडे!
सैणो सरीरौ साबा बौल़दा नै हांडे!
♪
आ फूलौलो फुलडू देवा फूलौलो फेढू!
आपड़ै बौदलै छ़ाडू हिरा नाथौ छ़ेढू!
♪
ओ हिरानाथै जोगियै किए तुंबड़े शिके!
गोल़ी नागौ रे च़ाकरे म्हारै कौरमै लिखे जय हो!
♪
ए गोल़ी नागौ देबता च़ाला गुढ़कू गुढ़ौ!
झौंटै रा डौल्ल़ू तेरी सैइतौ खी ज़ुड़ौ होरकीया!
♪
ओ कुबशी रे पौतरे हौरै पानू रे आगौ!
ग्यैरै गौतै खोलणे दैयौ राज़ी रे पागौ!
♪
आ कानौ गाड़ी केउटी देवा शिरौ गाड़े पागौ!
दैयौ च़ाला गांगै खी ऐबै रौश रौशी लागौ!
♪
ए भोल़े तेरे पौरज़ा देवा ज़ाणदे ना तेता!
आफी जाणै देवा गोलि़या नागा तिरथौ रा भेता!
♪
एबे बुशौ लाऔ नरैणिया दासौ घुघ्ते घुणौ!
तेरै फरोगौ खू पुरूआ आशौला कुणौ!
♪
कुणौ पुरू होला घिटका खौंडौ मिसरी खू पाका!
मेरै फरोगौ खू आंदै शोबेरामौ काका!
♪
आ मेरे होले टौंडकू रे डेउणै रे आदौ!
दुइयै भाए टांडवै देवा शोभारामौ साधौ!
♪
ओ ढींगडू देप्टा च़ाला मुखिया मसौदे!
साधा थामै पुरूआ मेरी पज़ैरली रे बौदे!
♪
बौदे नेगटा मौगने च़ाला राप्टा ज़वाले!
च़ाला खलाउनौ खू बुद्धिरामौ माले!
♪
ए सूनै रै बौंदढु देवा रूपौ रे कौंदौ!
बेटा बाल़ेनौंदौ रा च़ाला कौरमे च़ौंदौ!
♪
आ दैयौ च़ाला गांगै खी म्हारा सुनै रे शल़ाए!
फिंडू च़ालै काइतौ साथी मुखिया खल़ाए!
♪
ए खौड़ियौला गोल़े नागौ रौइया लागे रूंदे!
धौरमौ रे ऐबै कौरमौ रे किऐणे हुंदे!
♪
ओ नान्दू मेरी रैतियै रूणै रो ना कौरै!
तीरथौ नांहियौ ओरू शिगा फिरू घौरै जय हो!
♪
घौरै च़ांबी कोटौ री काल़्का कौरदी रौखिया त्हारे!
लांकड़ा लाटा कौरौ औबल़ी रे कारे!
♪
आ लाटा टेकै लांकड़ै मेरी तू रौइतौ आगू!
रौखियै रो बौच़णौ च़ांबी कोटौ खू मांगू!
♪
ए साथी लाऔला बौच़णौ देवा साथी लाओ रूए!
ढाल कौरौ नाउरौ सारो उज़ियौ हुए जयकार!
♪
ओ कुपड़ी खलाउनौ दा फिरेगा छ़ौंउ!
ज़ेठा खूंदौ पूजा नै औज़ौ किणा हांडू गौंउ!
♪
ओ ज़ेठा खूंदौ अढ़ैल़ू पुजा खांगटा गरांऔ!
दैयौ च़ालै सबांदै आगू शुआ देउरी ज़ांऔ होरकीया!
♪
आ ज़ैकारौ तेरे गोलि़या नागा भौला रौऐ भौला!
तीरथौ सबांदा तांऔ नाउरौ ढौल़ा!
♪
ओ ढाल कौरौ गोलि़या नागौ हाटौ पराह्टौ!
आफी च़ेतै माई दुर्गिया तू तिरथौ रे बाटौ!
♪
ए खौड़वेगा ज़ेठुआ आगू तिउणी री पाज़ौ!
टेका कौरै देवा बैल़ी खी कौरी शांबल़ौ नाज़ौ!
♪
नाज़ौ गुरू रा दुना देवा रोआ लाड़ा तोआ!
नान्दू मेरा गंगरोतुआ बादा कौठड़ा रौआ!
♪
आ हौरकेपौड़े न्हांए पांडू रे चाणे!
सौदा शिव पौरसै देवा पारबौते राणे!
♪
ओ ऋषिकेशौ न्हांड़ो नागा लौखमा झ़ुला!
कुजै रा जोया फुलडू देवा तिरथौ दा भुला जय हो!
♪
ऋषिकेशौ न्हांड़ो देवा हौरिदुवारौ!
सारै तिरथौ नांइयौ च़ाला बौदरी कदारौ!
♪
आ कदारौ न्हांओ बौदरी नागा आंच़ल़ी रो हौणू!
सात न्हांऐ तिरथौ ऐबै किणै किणै गौणू!
♪
ओ हौरिदुवारौ नांओ बौदरी कदारौ!
सारै पौरसौ नगेश्रौ ज़िणै औंउडौ रो छ़ारौ!
♪
आ नाथौ लागै बौदरी रै हिंयौ रै गोल़ै!
बिणा लागा कौथरी रा सूनै रै तोलै जय जय!
♪
ए ओतरौ गोलि़या नागौ सौरगौ रा राज़े!
घौरौ खी ज़ेठुआ गोआ फिरदा भाज़े!
♪
आ छुरो कौरौ मौउरो देवा देवरी रा नाथौ!
देवा नगेश्रा लागा साउणी रै साथौ!
♪
ओ हिरानाथौ लाऔला पुच गौल़ै दो छुरो!
देवा नगेश्रा तेरो हेरूवो का बुरो!
♪
ओ ओतरौला गोलि़या नागा लागिगा रोषै!
शुणदै नी हुकमौ मेरो डौरदै नै दोषै!
♪
आ छ़ौल़ी बशाशियौ आणा हौरै मतल़ोगौ!
पाकड़ौ भाइयौ नाथौ खू बौदरी रो भोगौ होरकीया!
♪
ए फिंडू काइतै हेरड़े पुचै चिठे लखाए!
दैयौ नगेश्रौ म्हारा घौरै लागा आए!
♪
ओ तिरथौ न्हांइयौ देवा घौरौ खी च़ाला!
ठारा बिशौ रै नौगरै किया दारूयै मिहाला!
♪
ओ आशियौ पौंच़ा देवा माई रै हाटौ!
जुब छ़ाड़ा गिनियौ छ़ौंउ देवरी रा नाथौ होरकीया!
♪
नाथौ नांदू सारे रैतौ दैयौ नाचि़यौ फेरा!
किणा रौआ देवा गोलि़या नागा तिरथौ रा फेरा जय हो!
♪
आ ज़ैकारौ तेरे गोलि़या नागा बौल़े जाउ बौल़े!
ढाल नौंइयौ रैस्तौ तेरी पौलगी खै ढौल़े!
♪
आ सूनै रा ज़ेया फुलढू होला दैयौ गोल़ी नागौ!
ढाल कौरौ गाएणौ ताखै मौज़टा चिरागौ!
ढाल कौरौ ताखै गाएणौ मावे करासू चिरागौ होरकीया!