واش عقلتي على داك الدار دالمدينة القديمة؟
واش عقلتي على داك الدار دالمدينة القديمة؟
والدنيا واشحال كان عليها د القيمة
والحومة والجيران، والنخوة د ناس زمان
كانت الحياة بسيطة، وكانت الفرحة ديـما
ديما ديما ديما
وديما ديما ديما
هاديك الصــورة، مازالا فعيني غير البارح
ذكريات كيف كانت لمديـنـة وكيف ولات
واش عقلتي على داك الدار دالمدينة القديمة؟
والرحبة دالسقاية عقلتي علــيها؟
اللي كــانت فجنب الواد
كثـــرو لمعامل فيــها
كثـــرو لمعامل فيــها
وتبدل لون الواد
وڤالو، والله أعلم
بسبابو مرضو لولاد، وبسبابوا خوات الرحبة، والحومة وماليها
واش عقلتي على داك الدار دالمدينة القديمة؟ (ألف باء تاء...)
ولمسيــد، هاداك لمسيـد
اللي مور الدرب، اللي ضيق وصغيـر
ومنو يمكن لك تخرج للجامع الكبيـــر
ولفقيـــه مول لبشــــارة
الله يواليه بالخير، الله يواليه بالخير
هاداك لمسيد آسيدي زال زال، وبناو مكانو عمارة
وكلشي بالأجل
ويلا جيتي تشوف، هاه راه بحال بحال لمسيد والعمارة
المهم مازال الدرب وما زال الجامع لكبير، وما زال الجامع لكبير
واش عقلتي على داك الدار دالمدينة القديمة؟
هاديك الدار لكبيرة فراس الحومة
تعقل على شامة؟ الي كــانت ساكنة تما
دابا هاديك الدار وقع عليها لغيـار وقسموها بيوت بيوت
ومن بعد
تنــادم معاهم الحــال الحال
ولكن حتى فات الفوت، الدار تباعت مقسومة هكداك بيوت بيوت
وفين مشاو الخوت؟ وفينك يا شامة؟
واش عقلتي على داك الدار دالمدينة القديمة؟
واحد النهار، دخلت مع لقواس
وفوق الشجرة د التـــوت اللي واصلة للقرمــود، شفت حمـــامة
وخــــذاتني لحمـامة، وتهت فدوامة دلماضي واللي فات، دلماضي واللي فات
وشويا الحمامة دوات، ايه دوات، وقالت ليا (ولايني لعجب هادا)
هاداك الواد الهــايج
الـــدار اللي بناو حداه كانت دار بــــلارج
موقفينها عليه حبــــوس
وكـــــان الداخل ولخــارج وكنا عايشين معاه وما كانشي كلشي فلـــــوس
وكانو الجـــــواد تايجيونا حتى للــواد
ويجيبولنا لحوايج والقوت والزاد وبلفرحة فالنفــــوس
واحد النهار (آ شتاتا تا تا تا آوليدلات الحراگة)
هبطو لبنات و لولاد يلعبوا فجنب الـــــواد
وواحد من لولاد ضرب بلارج بحجرة
طار بلارج وغاب بلارج وغابوا لجـــواد
دابا ايلا سولني ولدي، ايلا سولني ولدي، آش غانڤوليه؟
نڤوليه بلي نسينا شكون حنا، وماضينا وحضارتنا، ونكذب عليه
غادي نڤول ليه ونعاود، ونعتارف ونرتاح، ونسلم ليه المفتـاح،
والله عليا شاهد
حنا جيل اليوم غريب غريب غريب
غمضنا عينينا وظلمنا لمدينة وخونا الحديث
بنينا فيها عمارات، كلها فالليل تبنات
بسرعــة قدامت ورشات حيت فالأصل مغشوشة، حيت فالأصل مغشوشة
غادي انڤوليه أنا عندي فيك أمل نتا و جيل الأمل يمكن تلقاو لحل
باش الما يرجع للونو
ولفقيـه مول البشــارة
يرجع للمسيد يصونو
ويرجع بــلارج للواد الهــايج
وترجع شامة وترجع شـــامة
وترجع حليمة
واش عقلتــي على داك الدار فالمدينة القديمة دالمدينة القديمة؟
واش عقلتي على داك الدار دالمدينة القديمة؟
واش عقلتي على داك الدار دالمدينة القديمة؟
واش عقلتي على داك الدار دالمدينة القديمة؟