Familieschlittle am Brändlisberg
Familieschlittle am Brändlisberg
Familieschlittle am Brändlisberg
Bis Wengers am Sunntignamiitag
Familieschlittle am Brändlisberg bis Wengers am Sunntignammitag
D' Sophie rüeft "Papi, ziehsch mi nomal ue, aber das mal bitte bis zum Haag!"
De Urs seit
"Klar, ich zieh der de Schlitte,
Aber laufe muesch selber, sisch ja schliesslich scho s' dritte
Mal und du bisch doch kes Baby meh!"
Di Chli sitzt in Schnee
Und fangt a hüle also nimmt sie de Urs a de Hand aber sie macht kenn Wank,
Er lached und seit "aber s'letschtmal!" und sie seit "Danke!"
Familieschlittle am Brändlisberg ...
Damaskus, Militärstützpunkt, am halbi vieri i de Nacht –
En junge Ma packt es Fladebrot us, er heisst Karim und er bewacht
Scho sit 5 Stunde - de Südigang - zäme mit sim Fründ em Mirsi
S'Fladebrot het em sini Muetter - am Abig vorher mitgeh
Denn hät sie ihn lang in Arm gno und wie jedes Mal bim Abschied neh
En Kuss uf sini Stirn druckt und gseit "Gott söll mit dir si!"
Familieschlittle am Brändlisberg ...
Mäntigmorge, Allmendstrass in Thun, Ruag Abteilig Export
De Urs Wenger erchlärt de Journalischte, i fachkundige Wort
D'Effizienz vo Schwizer Splitterhandgranate
Wo de vom Tagi frägt "Wie vill und was für Chunde händ er?"
Seid de Urs "Natürli nur stabili und friedlichi Länder
Wie Jordanie, Qatar und d'Emirate"
De Karim nimmt en Biss vom Fladebrot und frägt sin Fründ öb die Stell
Im Gschäft vo sim Onkel immer no frei seig will er nüme Soldat si well
Doch i dem Moment knackt öppis hinter em Haag
Familieschlittle am Brändlisberg bis Wengers am Sunntignamittag
Bim z'Nacht seit d'Sofie "Papi, gell - mer gönd scho ganz ganz gli
Wieder mal zäme go schlittle? will geschter isch's mega luschtig gsi!"
De Urs seit "Klar - Am Sunntig - wenn's no Schnee hät" und git ere en Kuss
De Karim und de Mirsi dreied sich glichziitig um und
Gsend e Silhouette und das öppis z'flüge chunnt
Denn gits en Blitz und en Knall und denn isch
Schluss