La tettelbab sseḥṛa
Ɣef yidmaren n Tmazɣa
I tiṭ d tameɣra
N wureɣ ɣef i terɣa
Deg kra n tmura
Ɣur-neɣ d times d yiẓra
D akuffir yes i aɣ-tenɣa
Yekkaw yimi i tara
D ajṛad kan i aɣ-tebɣa
D tikawt n tmurt ɛni i yeskawayen ul
Si leḥnana d tayri
Alammi s lmut yiwen ur aɣ-iɣul
Ufan abrid i tisri
Yiwen wass kan ad d-yuɣal laman
Am Niagara ad nesɛu aman
Ad d-yeḥyu tudert
Am uzemmur am iniɣman
Deg sseḥṛa ad ten-naf gman
D tacriḥt n tedmert
La ttelbabent tmura
Ɣef uqeṛṛu n Tmazɣa
Yal ta i as-terra
D tafawet-is n sbiɣa
Leqraya, tira
Tilifizyuwat, leǧwameɛ ǧǧenǧunen
Yal wa d amek yesserwat
D tamrilt yeṭṭenṭunen
Tissit-nneɣ si tmurt n ubeṛṛani
I yeskawayen allaɣen
Alammi tudert i nennum akk tefsi
Yal wa d lǧens i t-yuɣen
Yiwen wass kan ad d-yuɣal laman
Am Niagara ad nesɛu aman
Ad nekkes sbiɣa
Tamazɣa tamurt i umi semman
S yismawen i tt-yeɣman
Tuqqel-d akken i tt-nebɣa