الايام ماعد تعيد نفسا
و شو لي كان صاير قبل ماعد عم بذكر اصلا
التفاصيل تروح معها
عم صير احسن
و كل الاتجاهات صارت عم تروح على بكرة
وماعم افهم
الدنيا فوق تحت كان ايدها لمسة بركة
تعودت كون مغناطيس و المشاكل معدن
انقتل مني كتير و لسه ماخلصت المعركة
واللي مات دفنتو مبارح وانا مبسوط بهالمدفن
حضنك آب بكانون
لو نضل نعيد هي اللحظة دي جافو
مكان ما تكوني فيه بتعبق بريحة شجر زيزفون
ولولا احزانا ما حسينا بفرحة هي اللحظة واللا شو؟
كل قومة بفضلا هيَ
مبارح حكتلي كتير الايام
رقيقة و بايدا تترك نسمات ربيع ع خدك
لكنا عم تسند جبال
تلتئم جروح ب ياسمين الشام
الجحيم يصير جنة طالما وياك
ترجع تامن باكتر اشيا كفرت فيها و قلبك يصلي تكون هي حقيقة هالمكان
بلم رمادي انا ع تكوينك
برجع بحرق قلبي لاضويكي
و كلشي قبلك علم
بمنهاجك كيف انسى
بدون وعي علمتيني
ميت بهالدنيا
بدي عيش جواتك
انسا الخوف من الدنيا كل ما دارت
جيتك بيوما غارق و كان حضنك قارب
ما بدي نصير بفرقة ولو بينا في كتير فوارق
في ندب بيتطيب و مافي ندب بينمحا
بلمحا انتشلت روحي لما كانت عالمحك
و كان لسه باقيلي تجربة وحيدة تكة لكمل لهالسفر
بصحرا مشاعر شفتا واحة
شريطة سودة ع قلبي ترحمي عليه
لمسة ايدك رجعت الرحمة عليه
و سبب كتر ذكري لهالكلمة ارتباط بهالليل
فكوني شريكة هالسهرة ويكون سوادا كحل عين
ما تضعفي لا
انا مكسور جناحي بس فيكي عم بقوا
لشيل همك عالكتاف
وعاش قلبي لي فيكي مات
تناقضك انك رصاصة حياة
باللاوعي راح مساري الك
القلب وهوي مغمض سار الك
تملكتو هموم الدنيا وصار الك
فاذا بيوم افترقنا ف هي نقطة لقاء
حتى ارجع قلك شكرا واعتبري تركتلك هالتراك
تذكار الك
افكار تجيك بعد ضياع سنين بكل ليلة
كل تشتيت بمية ضياع ضباب رؤى ب مية غيمة
بس احساسي بهالتوقيت بانو ماعد تضيع عيني
استقرار بجوا البيت مع دفا كتير (عيلة)
حرري المدن المحتلة فينا
و اختصري كل قصص طويلة
و قولي مافي ليل الا لينا
وبعتمًو شوف بعيونك انتي
تشوف اشلاءك كيف عم تشيلا
برقة كفا تعيد تكوينا
هيي السند الوحيد لضيمك
انثى بثنايا روحك لاغير