Sugnu ammucciatu e pedi i n'altari
Ca vojju mu sentu la genti chi dici
Ca vannu e vennu tanti personi e cu cerca aiutu e cu compassioni
Ma eccu ca veni nu veccjiu (du pizzu?) ca voli u perdonu pecchì eni riccu
Ca nci insegnaru ca e pedi i l'altari nceni u perdunu si menti i dinari
Ma eccu ca trasi na fimmana bella, abbasa l'altari du cielu e la terra
Nci ici: " Signuri aiutami tu io me maritu no tradisciu cjiù, vojju u ritornu na fimmana onesta, io vojju u mi cacciu a chidu da testa. "
Ma ampena nesci lu vidi distanti si scorda a promessa e torna cu amanti
Ma cu eni chistu chi veni strisciandu chi strica i dinoccja e veni pregandu
Dici: " Signuri io mali no fazzu io cercu la paci e cu nudu m'accjappu "
Ma dopu menzura è davanti la cjazza chi grida cu unu e nci dici co mmazza
" Dammi i me sordi " e si menti u iestima e pe pochi dinari si menti e nci mina
Puru nu latru mo veni a trasiri, cu sapi chi voli e chi ndavi a diri
Dici: " io arrobbu lu sacciu è sbagliatu ma è pe bisognu e su perdunatu
Senti a me vuci ti fazzu a promessa ca io cjiù n'arrobbu e mo vegnu a la missa "
È gia subba a porta e già guarda a na veccja, la segui la ferma e la burza nci scippa
Ma cu eni chista chi trasi e si scusa, chista si vidi che è na prostituta
Apri a borsetta e pijja i denari e i posa cjangendu supa l'altari
Arza a so vuci e nto cori soi spera mu eni ascoltata nta chista preghiera
Tutta convinta ca mo è perdunata cjudi a borsetta ma torna nta strata
E cu eni chist'autru chi trasi (?)
Chistu si vidi ca è nu mafiusu
Cjinu d'anedi bracciali e denari e menti a lu centru i l'altari
E mentri prega si senti sparari nce fora lu sangu da genti chi cadi
Dezzi u cumandu e mo abbasa lu santu ma io mi domandu se sannu chi fannu
Chista è la genti chi veni mu prega prometti i nu modu e fa i n'atra manera
Quanti promessi e pedi i st'altari, quanti preghieri e quanti denari
E u previti trasi e si faci la cruci, cjudi la porta e cu sapi chi faci
Li mani strofina si pijja i denari si menti nta burza e basa l'altari