Whar goes the grey goose
When he flies by
Wae the wind on his tail
And a scud on the sky?
Dis he wing tae the hill
Or roost i' the sea?
"Speir thoo the Wast wind,
Bit speir no me!"
Whit maks the' Dancers
Flame i' the sky
When the Sun has gaen doon
And the winds blaw high?
Hoo they shiver and shimmer
Sae lovely tae see.
"Speir thoo the Wast wind,
Bit speir no me!"
Whit maks the tides than,
Wae thir ebb and flow?
They bore awa' Johnnie
Hid seems lang ago.
And many a message I've sent ower the sea.
"Speir thoo the Wast wind,
He'll tak id for thee."
For he, like the grey goose,
Maan wander sae free,
And flit like the dancers
In lands far fae thee.
Bit the tide o' love's ocean
Will bring him again.
Speir no the Wast wind,
That weel I ken.
Whar goes the grey goose
When he flies by
Wae the wind on his tail
And a scud on the sky?
Dis he wing tae the hill
Or roost i' the sea?
"Speir thoo the Wast wind,
Bit speir no me!"