Ay asmi la ttnadiɣ i ṭṭlam
A tafat ur d iyi-d-tṣaḥeḍ
Ssaɣen-tt-id wid nessaram
Kečč a gma ad iyi-tt-id-tessenseḍ
Zwaren-d deg-k at wexxam
ɣas akken a tessarameḍ
Nnan-t deg zzman
Lxuf yekka-d seg laman
Asmi n-ufiɣ agraw yeččur
Susmen ugin ad cnun
Ɛerqen-asen ula d lehdur
Wehmeɣ d acu i la ttraǧun
Ziɣ kul yiwen ikukra meεdur
Yettraǧu win ara tt-id-yebdun
Ɣas tugadem
Ad rewlen ma tedduklem
Lǧerḥ ittabaε wayeḍ
Nṭerreɣ d ddwa yella
Sawleɣ-ak-n a gma tɣabeḍ
Ufiɣ yakk tagmat teḥfa
Ma tḥulfaḍ s udfel semmeḍ
A win yeṭṭsen di trakna
D iṭij, d agris
Kul wa yelha-d d ccɣel-is
A win ileḥḥun deg yiḍ
Deg uzal d acu i tugadeḍ
Bexlaf ṭṭlam d usemmiḍ
D acu n lweḥc i d-temlaleḍ
Muqel deg lemri ad twaliḍ
Ad ak-d-iban win ɣef i trewwleḍ
D iman-nwen
Ay tugadem ad d-temlilem
A win yugaden tidet
Mi tt-tgezmeḍ ad yaɣ uẓar
Teẓriḍ gma-k di tcerkett
Tenniḍ akken i yextar
Yiwen wass ad tbeddel twerqet
D kečč ara ḥebsen leṣwar
Ass-nni ara tiniḍ
A tidet anda telliḍ
A win yettagaden uzzal
Lmut yid-s i tettiliḍ
Ur tneṭṭeq ur tessawal
Am tili-k i tt-tettawiḍ
Yiwen wass yid-k ad d-temqabal
Asmi ara k-id-yerr lḥiḍ
Sani ara terreḍ
Ma ur tenɣiḍ ard ad temmteḍ
A win yettagaden ccwal
I lehna s wacu i d-tettas
Ḥaca netta iwumi tessawal
Kul mi ara tt-id-qesden ɣer llsas
Ttejra-nni i ifettu lḥal
D ccetwa i iεeddan fell-as
Ur thennaḍ
Alami εettben wiyaḍ