Sol var oep å fovlen saeng så fint
Dæj måen* a cykelt te det føest tog,
Hva davvi dæj vil brieng, det væest a intj*
Så hae a nok heller intj skyndt mæ så gråev*.
Hon ha' slet intj suer mæ* på de siest par brøev
Det var faktisk mø læeng seen* siest gåeng hon skrøev,
No maet a snaek me' he', hels ku a intj løev*
Det var derfor a sku no det tog.
Da a endlig stu foran he' dør*
Ventj a-e yevblik*, ejen a ringt på,
A prøvve på-å ræn uk*, hva hon vil jøer*
Hon vil selvfølgelig nok blyv hilt forskrækle glåe*.
Hon vil val flyev mæ om halsi å græe å gleæ
Så vil a stryeg he' hoer lisse steel å sæej:
"Så, så - så, så, så, så, så"
"No ska do intj vær lij-o mier*."
Tånken om så glåe som hon vil blyev
Dæj gae mæ stue klumper i min hals,
A tentj på hvoffor hon intj ha' ku skryev
Å a bløv pluds'lig båeng for, dar sku vær noe galt.
Mærklig nok var-e først dæjgåeng, a tentj-e po-e*
Hon ku jo vær tjyr nier* heller kommen te skåe,
A fløev eej å døen uen å båenk heller noe
A var båeng, hon sku leeg* å vær dø'.
Eej i værelst var-e mørkt endnu
For he' gardiner, de var trokken for,
Ja, det var som om met hjaet jiek hilt i sto*
Da a stu å prosselt me'-å rul frå*.
Så bløv-e lyst, å a so hon sae i sengen å sterre
Hon kløej sæ lidt i hoere, hon var selvfølgelig noe forvirre,
Men hon græe intj å gleæ, intj så mø a ku sij-æ*
Hon såe: "Hva lavver do egnli her så tille på davvi*?"
A saet mæ nier, det her var intj så nemt
For hon bløev intj så glåe, som maj sku troev,
Hva klokken dæj var, det hae a glemt
Men det var da åeltj for tille, ku a nok forsto.
Så fæek a yev på* en merskumspibe dar låe hæen i veeje*
Å hon ha' aldrig røgt, så det ku da intj vær hejes,
A spuer hvis det var, intj for a sku blæej mæ i-e*
Men hon sae båer å kløej i he' hoer.
"Hva menner do? Nåh piben, hvis dæj er?"
Hon prøvve på å grien, det lykkest intj,
"Jo sier do, grojen te dæj leger her*"
"Det er at én dar hjæer Bo, har glæemt dæj her i jaes sintj*".
Haem Bo haj var så flink, haj kam å hjalp me' he' lajs*
Hans faer var adjunkt å bovve lieg uenfor Randers,
Så var-e såe, så nemt ku-e sajjes
Å a ha' egnli væst-e hiele tijn.
Skyjjeren de drøv rask åstæ dæj næt
A cyklet hjem, fra det siest tog,
A ståjst lidt hæen ve tjømajs automat*
Å trak en flødebåel me' kokos på.
A var hilt slavve uk*, a var træt å slatten
A spuet i årnli slårk eej i* automaten,
Mens a forbaent åel adjunkter i verden
De sku pines ihjel, ja de sku'!
*) Dæj måen = den morgen
*) Det væest a intj = det vidste jeg ikke
*) Gråev = voldsomt
*) Suer mæ = svaret mig
*) Mø læeng seen = meget længe siden
*) Hels ku a intj løev = ellers kunne jeg ikke leve
*) He' dør = hendes dør
*) Ventj a-e yevblik = ventede jeg et øjeblik
*) Ræn uk = regne ud
*) Jøer = gøre
*) Glåe = glad
*) Intj vær lij-o mier = ikke være ked af det mere
*) A tentj-e po-e = jeg tænkte på det
*) Tjyr nier = kørt ned
*) Leeg = ligge
*) Met hjaet jiek hilt i sto = mit hjerte gik helt i stå
*) Prosselt me'-å rul frå = rodede med at rulle fra
*) Ku sij-æ = kunne se det
*) Tille på davvi = tidligt på dagen
*) Yev på = øje på
*) Hæen i veeje = henne i vinduet
*) Blæej mæ i-e = blande mig i det
*) Grojen te dæj leger her = grunden til at den ligger her
*) I jaes sintj = sent i aftes
*) He' lajs = hendes lektier
*) Ståjst lidt hæen ve tjømajs automat =
Standsede lidt henne ved købmandens automat
*) Slavve uk = slået ud
*) Spuet i årnli slårk eej i = spyttede en ordentlig klat ind i