Oh, som de da skæjjes*, uv i tjømajs* bagbutik
Om hves biler dar er bæest, å som spoet* å politik.
Tjømajs kvåen stoer eej ve disken*
Hajlen goer i roev å fre*,
Kun i nødstefælle kommer maej* te
Å hiele verden er å laev* - uv baegve.
Uv i bagbutikken, dar er rænt hølt eej i røeg*
Ser* i bette flok å tværes*, såntj tediels i spøeg.
Men me' jet så vo æ aller*
Bette Simon haj vo vreej*,
Å så kan haj intj sæej noe, uen å baej te*
Nej, haj truwer javnli me' å go - uv baegve.
Simon haj hår rest sæ, å haj råber intj så lidt
Haj er mø politisk, å står fast på hans partitj.
Haj er villig te å værri*
Det skal intj kom an på det,
Æ par flasker øl å så en kaeg te
Nej, dar er ejen fjætteritj* - uv baegve.
Tjømaj haj jier Simon ret* i, hva det så ska væer
Men på dæj naen sij håller haj no osse me' de ajjer*.
Oh, i tjømaj må vær varsom
Haj ku næmt sæt hajlen te,
Å det tøgs haj vaegt haj er istaej te*
For dar hajles da en diel - uv baegve.
I tjømajs bagbutik, det er der det foregoer
Der er verdens politikken, bløwen åernt i månner oer*.
Ejen* spørgsmål er for stue
Å ejen er for små,
Å ejen teoritjer er for vaeg te
Å ku start en hie* debat - uv baegve.
*) Skæjjes = skændes
*) Tjømajs = købmandens
*) Spoet = sport
*) Kvåen stoer eej ve disken = konen (hustruen) står inde ved disken
*) Hajlen goer i roev å fre = handelen går i ro og fred
*) Maej = manden (købmanden)
*) Å laev = af lave
*) Rænt hølt eej i røeg = helt hyllet ind i røg
*) Ser = sidder
*) Tværes = skændes
*) Så vo æ aller = så bliver det alvor
*) Vo vreej = bliver vred
*) Uen å baej te = uden at bande til
*) Værri = vædde
*) Ejen fjætteritj = ingen smiskeri
*) Tjømaj haj jier Simon ret = købmanden han giver Simon ret
*) Ajjer = andre
*) Det tøgs haj vaegt haj er istaej te =
Det synes han dårligt han kan tillade sig
*) Månner oer = mange år
*) Ejen = ingen
*) Hie = hed