Hawaa bhii kHushagawaar hai, guloN peH bhii nikhaar hai
TarannumeiN hazaar hai, bahaar purbahaar hai
KahaaN chalaa hai saaqiyaa, idhar to lauT idhar to aa
Arey, yeh dekhtaa hai kyaa? uThaa subuu, subuu uThaa
Subuu uThaa, piyaalaa bhar, piyaalaa bhar ke de idhar
Chaman ki simt kar nazar, samaaN to dekh bekHabar
WoH kaali kaali badliyaaN, ufaq peH ho gayi ayaaN
WoH ik hajum-e-maikashaaN, hai su-e-maikadaaH ravaaN
YeH kyaa gumaaN hai badgumaaN, samajh naH mujh ko naatavaaN
KHayaal-e-zuhad abhi kahaaN? abhi to maiN jawaan hooN
IbaadatoN kaa zikr hai, nijaat ki bhi fikr hai
Junoon hai sawaab ka, kHayaal hai azaab kaa
Magar suno to shekH ji, ajeeb shai haiN aap bhi
Bhalaa shabaab-o-aashiqui!, alag huay bhi haiN kabhi?
Hasiin jalwaaH raiz hoN, adaaeiN fitanaaH kHaiz hoN
HavaaeiN itr baiz hoN, to shauq kyuN naH taiz hoN?
Nigaah haai fitanaaH gar, koi idhar koi udhar
Ubhaarate hooN aish par, to kyaa karey koi bashar?
Chalo ji qissaaH mukHtasar, tumhaaraa nuqtaa-e-nazar
Durust hai to ho magar, abhi to maiN jawaaN hooN
YeH gasht kohsaar ki, yeH sair ju-e-waar ki
YeH bulbuloN keH chahchahey, yeH gulrukHoN keH qah-qahey
Kissi sey mail ho gayaa, to raNj-o-fikr kho gayaa
Kabhi jo waqt so gayaa, yeH haNs gayaa woH ro gayaa
YeH ishq kii kahaaniyaaN, yeH ras bhari jawaaniyaaN
Udhar sey meharbaaniyaaN, idhar sey lantaraaniyaaN
YeH aasmaan yeH zamiiN, nazzaraahaa-e-dilanashii.n
UnHey hayaat aafareeN, bhalaa maiN chhoRh dooN yahiN
Hai maut is qadar qariN, mujhey naH aayegaa yaqiN
NahiN nahiN, abhi nahiN, nahiN-nahiN abhi nahiN
NaH gHam kashood-o-bast ka, balaNd ka naH past ka
NaH bood ka naH hast ka, naH vaadaa-e-alast ka
Ummid aur yaas gum, havaas gum qayaas gum
Nazar sey aas-paas gum, hamaa, bajuz gilaas gum
NaH mai meiN kuchh kami rahey, qadaaH sey hamdami rahey
Nashist yeH jami rahey, yahi hama hami rahey
WoH raag chheRh mutribaa, tarab-fizaa, alam-rubaa
Asar sadaa-e-saaz ka, jigar meiN aag de lagaa
Har ik lab pe ho sadaa, na haath rok saaqiyaa
Pilaaye jaa pilaaye jaa, abhi to maiN jawaan hooN