فارس، يا فارس
نبيل عمال بينده
بينده من زمان
ولحد إمتى هينده؟
من صغر سنهم واللقا ما بينا عادة
تلاتة كل واحد فينا مختلف بزيادة
نبيل الهادي فينا والعاقل بنشوفه أكبر
لكل موقف عنده حكمة وعمر ما ليها كرر
وعكسه فارس (فارس) شقي طول عمره مهما كبرنا
قلبه طاير ودمه فاير أكتر منا (قلبه طاير)
وأنا بحر الوسطاني بينهم فيا منهم الأتنين
بتجنن وأبقى عالي وأرجع أهدى في ثانيتين
جربنا حاجات كتير لعب وهزار وفرح
واِستحمنا برضو ياما حزن وخناق وجرح
وكبرنا أكتر ولقينا العيشة مش بالساهل
لو مهما زاد الحلم بصحابي أنا هبقى قادر
بس الحمل زاد يا صحبي وجه وقت البعاد (بس الحمل زاد يا صحبي)
ده كلام في عقل فارس لما بيغرق في السُكات
ونبيل كلامه ثابت "بكرة أحلى لو حاولنا (آه)
مش هنلوم الظروف والزمن وده حظ جيلنا"
وفي ثانية كانت تقوم خناقة بينهم بعدها
"يعم كفاية حكم مش ناقصين ولا وقتها"
ويرد نبيل "أصبر يا صحبي ده الطريق طويل (أصبر يا صحبي أصبر)
بكره القليل على القليل بالصبر يكون كتير"
"هنستحمل لإمته ما اِستحملنا كتير حاولنا
مش هرضى بالقليل ولا هسمح تلوم في جيلنا"
كان ودي أقوم أفض بينهم بس مش هينفع
طول عمري دوري وسطهم شاهد بيشوف ويسمع
الدنيا بحر عالي والصحاب طوق النجاة
خوف عاللي نَفسه في اللي نِفسه فيه مهوداه
فات كتير بعد الخناقة أول مرة من سنين
يفضى المكان عليا وما نبقاش متجمعين (آه)
وبعد أيام جه نبيل عندي يزورني
"ما شوفتش فارس؟" سألني بخوف أكدلي ظني (نبيل عمال بينده)
واليوم التاني كان قدامي فارس بيصارحني (يا فارس)
"ناويت أسافر وأتمنى نبيل يكون سامحني
ما بقتش قادر أحاول ومات فيا الأمل
الحال بيسوء زيادة يا صحبي طب إيه العمل؟"
"رغم المجاذفة بدون ورق مطمن للطريق (بدون ورق)
اِخترت البحر يكون سبيلي وللسفر صديق"
لأ، لازم تحاول تاني، تحاول أكتر
يا فارس ده إنتحار، إزاي لنفسك تبرر؟
أهوالي هتعديها إزاي في مركب صيد؟ (مركب صيد)
ما تقولش الموج هيشلني ولأي كلام تعيد
مش هعرف أحميك يا صحبي مش بإيدي مش هقدر
أنا موجي عالي وإنت عندي غالي ومتقدر
الدنيا بحر عالي والصحاب طوق النجاة
خوف عاللي نَفسه في اللي نِفسه فيه مهوداه
خاف على نفسك يا صحبي وعلى حبايبك بعدِك
ده البحر ياما غرق ياما فرق ناس كتير قبلِك
♪
نبيل عرف الحقيقة الصدمة كانت أقوى منه (آه)
لو شٌفتوا شكله وقتها تدوله ضغف سنه
كنت مستنيه يجيني؛ أصلي عرفت أنا قبلِه
ما هو مات ما بين إيديا ولسه في حضني أنا مخبيه
لو كان فهم كلامي لو كان لصوتي سمع (يا فارس)
لو كان عرف أن كل نقطة فيا دموع ووجع
على فارس واللي قبله واللي هيروحوا بعديه
على أحلام غرقت وراحت جوه البحر اللي مداريه (عمال بينده)
لو بس حس عذاب غيابه اللي سايبنا فيه
أول لو بس قرا جواب نبيل اللي كتبه لِه
أنا مش بلومك أنا ولا بلوم البحر (آه)
بس اللي باقيلنا منك حزن وآلم وقهر
كان نفسي تشوف ولادي، كان نفسي أشوف ولادك (كان نفسي أشوف ولادك)
كان نفسي ربي يجعل معادي قبل معادك
كان نفسي ولسه نفسي أشوفك تاني عن قريب
ونفسي ما شوف فارس تاني عن صحابه يغيب
الدنيا بحر عالي والصحاب طوق النجاة
خوف عاللي نَفسه في اللي نِفسه فيه مهوداه
خاف على نفسك يا صحبي وعلى حبايبك بعدِك
ده البحر ياما غرق ياما فرق ناس كتير قبلِك