Jetzt gseht me wider jede Friitig
So Inserat i siinere Ziitig
Wo mer fett druckt läse chann:
"Heute Metzgete zum Wilden Mann
Es empfiehlt sich höflich s'Wirtepaar
Und s'Musig-Duo Sunny Star!"
Wänn's fridlich zume Week-End znachtet
Ganz i de Chuchi vo de Beiz
Mer hätt es härzigs Säuli gschlachtet
Und z'Abig ab den achte treits
D'Rosvita, blond und ime Minip'
I Form vo Bluet und Läberwürscht
Am Tisch me schnuuft de Gschmack vo Rosmarin ii
Und fangt aa spachtle wie nen Fürscht
Me sitzt nid uff de Schtüel, me hocked
Und git sich richtig populär
Und wänn als zweits dänn Cotlett locked
So zünftig gross und zünftig schwär
Dänn tropfed s'Fett uf d'Hämpelbruscht
Und scho häsch uf e Bratwurscht luscht
Jetzt gseht me wider jede Friitig
So Inserat i siinere Ziitig
Wo mer fett druckt läse chann:
"Heute Metzgete zum Wilden Mann
Es empfiehlt sich höflich s'Wirtepaar
Und s'Musig-Duo Sunny Star!"
D'Kapälle spilt en glatte Schottisch
Und wämer au vo Fleisch halbtot isch
Tuet sicher keine kulinarisch schone
Und schöpft drei wiiteri Portione
Bim Ablick vo däm frische feine Schwiinig
Dänkt keine a di eigeni Erschiinig
Mer frisst sich quer dur s'ganzi Menü
Und lockered sich s'fäschtlich Tenue
Me zieht euphorisch d'Tschööpe ab
Und macht uf kän Fall uf em Täller
In Sache schnabuliere schlapp
Und au de Landwii us em Chäller
Treit mit siim Bouquet zimli glii
Zur Jubel-Trubel-Stimmig bii
Jetzt gseht me wider jede Friitig
So Inserat i siinere Ziitig
Wo mer fett druckt läse chann:
"Heute Metzgete zum Wilden Mann
Es empfiehlt sich höflich s'Wirtepaar
Und s'Musig-Duo Sunny Star!"
(Ooh... nur nüt meh fettigs...!)