Chuum hät e Frau de erschti Sohn gebore
Da händs de Vater scho uf d Rolle gnah
Und d Lüüt hend gseit me gseechi's a den Ohre
Das Büebli schlön genau am Vater nah:
"Jä lueg au doo, ganz de Bappe!"
Ganz de Bappe, ganz de Bappe, ja de Bappe hät das au
Ganz de Bappe, ganz de Bappe, ganz genau
Das Büebli isch gägs Sträähle und gägs Wäsche
Und s Fingernägel schniide schätzt er nie
Doch bringt em öpper siini Schoppefläsche
Dänn strahlt er ämigs wiil er eis cha zie
"Mmmm, guti-guti feini-feini!"
Ganz de Bappe, ganz de Bappe, ja de Bappe hät das au
Ganz de Bappe, ganz de Bappe, ganz genau
Mer glaubt s nid wie dä d Auge cha verdräie
Und schimpfe chan er au scho as e chli
Und wenn s em nid grad passt dänn ghöörsch en chräie
Und wenn er fertig gschreit hat, schlaft er i
Ganz de Bappe, ganz de Bappe, ja de Bappe hät das au
Ganz de Bappe, ganz de Bappe, ganz genau
Und hät de chli emal nid grad sis fueter
Und hät er a sim Tuume wehli-weh
Dänn brüelt er wie am Spiess und rüeft der Mueter
Und d Mueter die seit resigniert "Oje...
"Nid zum Glaube, ganz de Bappe!"
Ganz de Bappe, ganz de Bappe, ja de Bappe hät das au
Ganz de Bappe, ganz de Bappe, ganz genau