Am Andi sini Bandi hät em Luca abpasst nach de Schuel
Z'nüünte sind's am Egge gschtande und händ richtig bös driigluegt
Dä Luca hät nöd lang überleit
Er isch zum Andi und hät gseit
Ich gseh scho, ihr wänd Schtriit aafange, Haar uusrisse, bisse, chlüübe
Ihr chönd mir am Ranze hange, ihr chönd mir alli gschtole bliibe
Was ihr mached, isch mir gliich
Aber mached's ohni mich
Dä Andi hät das nöd wele schlucke, und er isch am Luca naa
"Meinsch, du chönnsch dich eifach trucke? Jetz wirsch abgschlage, jetz chunnsch dra"
Es isch ärnscht, es isch kan Witz
Dä Luca isch devogrännt wie de Blitz
Dä Andi hinedrii und schliesslich holt er dänn dä Luca ii
Schupft en um und fröget: "Möchtsch nöd au i minere Bandi sii?
Dä Luca hat nöd lang überleit
Er hät nur glachet und hat gseit
Ich gseh scho, ihr wänd Schtriit aafange, Haar uusrisse, bisse, chlüübe
Ihr chönd mir am Ranze hange, ihr chönd mir alli gschtole bliibe
Ich hoffe numme schwär, ich landi
Nie i sonere tumme Bandi
Jetzt hät dä Andi richtig aagfange, hät Haar uusgrisse, pisse und klobe
Aber es isch nur es paar Sekunde ggange, da sitzt plötzlich dä Luca obe
Und seit: "Häsch du Löli no nie ghört devo, dass ich Karate mache, sit em Chindsgi scho?
Du warsch im Schpital, wann ich eimal zueschlah, aber chasch au e gwöhnlichi Ohrfiige ha"
Dä Andi rüeft: "Schlönd en zäme, hälfed mer, dä mogemer scho"
Aber es chunnt käne, nei, di ganzi Bandi lauft devo
Und sini Fründe säged zunenand
"Es isch doch eigetlich ä Schand"
Dä will doch nur Schtriit aafange, Haar uusrisse, bisse, chlüübe
Dä cha eus am Ranze hange, dä cha eus doch gschtole bliibe
Und das isch dänn natürli glii
S'Ändi vo de Bandi gsi