नको करूंस वल्गना रावणा निशाचरा!
समूर्त रामकिर्ति मी, ज्ञात हें सुरासुरां
वंदनास योग्य मी पराविया पतिव्रता
पुण्य जोड राक्षसा झणीं करुन मुक्तता
लाज राख नारिची वीर तूं जरी खरा
समूर्त रामकिर्ति मी, ज्ञात हें सुरासुरां
राष्ट्र तें जगावरी नाममात्र राहतें
काय आग लाविशी तुझ्या करें तुझ्या पुरा?
समूर्त रामकिर्ति मी
ज्ञात हें सुरासुरां
जिथें तिथें दिसे मला लोकनाथ राम तो
शयनिं ये उशातळीं रामहस्तवाम तो
चिंतनांत पूजिते त्याच मी धनुर्धरा
समूर्त रामकिर्ति मी
ज्ञात हें सुरासुरां
परत धाड रे मला प्रियासमीप रावणा!
शरण त्यांस रक्षुनी राम देइ आसरा
शरण त्यांस रक्षुनी राम देइ आसरा
समूर्त रामकिर्ति मी, ज्ञात हें सुरासुरां
ज्ञात हें सुरासुरां
नित्यशुद्ध जानकी राघवास अर्पुनी
ना तरी मृतीच ये चालुनी तुझ्या घरा
ना तरी मृतीच ये चालुनी तुझ्या घरा
समूर्त रामकिर्ति मी, ज्ञात हें सुरासुरां
ज्ञात हें सुरासुरां
इंद्रवज्रही कधीं चुकेल घाव घालितां
क्षणहि आयु ना तुझे रामचंद्र कोपतां
रामबाणवृष्टि ती प्रळयसी भयंकरा
रामबाणवृष्टि ती प्रळयसी भयंकरा
समूर्त रामकिर्ति मी, ज्ञात हें सुरासुरां
ज्ञात हें सुरासुरां
ठाकतां तुझ्यापुढें वीर युद्धकाम तो
ठेवणार वंश ना असा समर्थ राम तो
अधम काममूढ तूं, विचार हा करी जरा
अधम काममूढ तूं, विचार हा करी जरा
समूर्त रामकिर्ति मी, ज्ञात हें सुरासुरां
ज्ञात हें सुरासुरां
बघेन रामबाण मी निडर या तुझ्या उरीं
कंक पंख पाठिशीं, नामचिन्ह ज्यावरी
भारमुक्त होउं दे एकदां वसुंधरा
भारमुक्त होउं दे एकदां वसुंधरा
समूर्त रामकिर्ति मी, ज्ञात हें सुरासुरां
ज्ञात हें सुरासुरां