هذي الرسالة عارف انها ما راح تكون مسموعة
لصاحب الشان اللي كنت انا انتظر رجوعه
على أمل اخفف من آلام روحي الموجوعة
لو جا قدر الله، محد يقدر يرد وقوعه
آمنت بالله، وبالوالدين احسان
قبل التحية اخترتها لسطوري عنوان
سلام يا والد، كيف حالك؟ عساك شفت النعيم
ما نسيتك، كل يوم ادعي لك في النعيم تقيم
تسأل عن حالي؟ طيب، بس شينة فقدتك
امي تحكّيني عنك زادت في قلبي محبّتك
كانو يقولو لي انك مسافر، طويلة رحلتك
عشان انام وانا صغير، كنت اشم مخدتك
واتأمل صورتك وجوارحك
وفي الزحام اطالع في وجوه الناس اقارنها بملامحك
على امل اني اصادفك في اي تارة
واجيبك البيت معي وازفّ لأهلي البشارة
كان لما يدق جرس الدار، اجري واسوي لوية
اسابق اخواني في بالي اقول ممكن يطلع ابويا
هذي احلام الاطفال
ضحكت يالغالي؟ ولدك كان واسع الخيال
الغالي اللي نحبه, والجناح اللي محتوينا جنبه
الأمان لنا في قربه, مكانا قلبه
الله يحفظك يا بابا
ابتي لله دره، عسى ربي يطول لنا في عمره
تاج الراس كيف ما نبره؟ ما نخالف أمره
الله يحفظك يا بابا
اول يوم في الدراسة، اولى ابتدائي
في ظهري شنطتي وامي لبستني ردائي
على باب المدرسة كان هناك معلمين
ابن يقبل اليدين ،اب يقبل الجبين
ابشرك صرت افك الخط واعرف الالف باء
علومني ديني والتوحيد وعندي اصدقاء
بس اللي كنت ما احبه واعتبره منهم غباء
لما يطلبوا مني حضورك مجلس الآباء
ما علينا، خلصت الدراسة واخذت الشهادة
فرحت امي فيني واخوتي غمرتهم السعادة
شقيت طريقي وحدي كنت اصارع الامواج
أمي علمتني في الدنيا غير الله لا تحتاج
خيرك سابق ومغطينا، حتى وانت تحت الارض
بس لابد اكد بنفسي، امان من اي قرض
اشتغلت في اربع وظايف بدال الوظيفة
رواتب قليلة، وانا عالية عندي السقيفة
نجحت في مجالي، اصبحت جدة تعرفني
صار ليا صيت وناس تحبني وتدعمني
ولو ان اعدائي كثار يتمنوا لي الرداءة
لاتخاف عليا، ولدك كاسر عيون اعداءه
الغالي اللي نحبه, والجناح اللي محتوينا جنبه
الأمان لنا في قربه, مكانا قلبه
الله يحفظك يا بابا
ابتي لله دره، عسى ربي يطول لنا في عمره
تاج الراس كيف ما نبره؟ ما نخالف أمره
الله يحفظك يا بابا
ما طولت معايا، بس لك في بالي ذكريات
تخصني معاك، ما انساها حتى الممات
كأنها ومضات، تمر في بالي وتروح
لكنها رغم الضبابية تسعد لي الروح
اسأل عنك المعارف، بالطيب يذكروك
يذكرون ادق تفاصيلك لليوم ما ينسوك
اسمع من الأقارب واصحابك اللي يحبوك
انت اكثر واحد من بين اخوانك تشبه ابوك
يا لفخري العظيم، لما اسمع ذي العبارة
ماهي فقط تشريف، هي لي تكليف وجدارة
بقدر الاستطاعة امشي على خطاك
انت خليت كل من عاشرك يدعي لمن رباك
واذا انجمعوا الناس ليوم شهق الانفاس
اسأل الله ان تكون مرفوع الهامة والراس
ابيض الوجه تنزفّ للجنة زف الاعراس
ّسندس اللبوس, على الارائك جلّاس
وانا بسعى في الدنيا انّ اعمل الصالح الزين
واصبر فيها ، على قسوةّ البعد والبين
عسى يشفع لي عند الله، مُحمّد النبي
وعند حوضه يا أبي أشوفك شوفة العين
الغالي اللي نحبه, والجناح اللي محتوينا جنبه
الأمان لنا في قربه, مكانا قلبه
الله يحفظك يا بابا
ابتي لله دره، عسى ربي يطول لنا في عمره
تاج الراس كيف ما نبره؟ ما نخالف أمره
الله يحفظك يا بابا