När luege sie wieder so ärnst
När schwige sie wieder im Tram
Lö sich us übere Job
U dass es fiister sig i däm Land
Wiissi Gsichter
Im Schiin vom Bildschirm
U jede Abe hei die Verliebte
Ihres Handy me gstriichlet aus enang
Lug angeri si iz Vätter
U ig immer no e Fädere
Geng düre Wind u geng am schwäbe
U chly so tue als wäri frei
Aber meistens alls okay
Was i mach? I ha ke Ahnig
Aber muess o niemer angers frage
Solang dr Wind mi no ertreit
Üsi Eltere heinis gseit
Mir sölle mache was mir wei
Bis mir Ching hei u alles mache
Damit sie chöi mache was sie wei
Aber was i würk nid weiss
Isch wie ig ihne söll biibringe
Dass ds Läbe nur e Sinn het
Wenn mir ne üs erfinde
Weisch e Job git mir Struktur
Git mir Brot u git mir Rueh
Cha mir die meisti Zit iirede
Das heig alls gar nüt mit mir z tüe
Am Morge früeh ar Tramstation
Merki das isch alles e Ablänkig
U i däm Momänt bini eis
Mitem Alki ufem Bänkli
U säg mir wieviel isch Musig wärt
Chum leg no bitzli öppis druf
Gseh wies mi langsam korrumpiert
Sitdäm i me ha als i bruch
U sie säge was sich nid rächnet
Muess halt wäg. Das sig nid schlimm
Doch het nur Wärt was no räntiert
De macht o Zämesy ke Sinn
U we mir vom Markt am rede sy
Meine mir wieder e Gott
U s isch wie früecher
Hani gnue Gäld
Macht dä Gott drum was i wot
Für das zahle mir jede Priis
Wüu mir meine
Dass sechs lohnt
So wird d Bible zumene Büro
Ds Paradies zure Pension
U was när chunnt
Wei mir nid wüsse
I dr letschte Zit isch dr Tod
So oft a mir verbygloffe
Dass ig ne mittlerwile grüesse
So
Salut
Wie geits dir
Säg wosch di nid setze
Aha
Du muesch gd wieder witer
Nenei
Sicher me gseht sech
Ja ja
Sit i di ha gseh
Hani gwüsst
I vergiss di nüm
I hoffe nur
Wenn du de zuemer chunnsch
Begrüessi di aus Fründ
Wie sölle mir je mit dir deale
Wüu du chunsch nid zum verhandle
Du machsch ds Läbe eigentlech riicher
Nur hei mir das nid verstande
U Mönsch sy heisst o
Dass d Frage z gross sy zum se trage
U wär z lang i Himmel ufeluegt
Ziehts unweigerlech abe
U jedes Gsetz jedi Gschicht
U jedi Strophe
Isch nur dr Versuech
Em Chaos e chly Ornig abztrotze
I bi programmiert uf Sinn
I weiss nid gnau wie das geit
I weiss nur
I cha geng no lache
Obwohl dass ig doch weiss
We die Existänz ke Zwäck het
Wärs ja gschider gly verbi
I ha mers ärnsthaft überleit
U dänkt
Ja i blibe glich
Für die chlyne Stückli Liebi
Für Träne u für d Familie
U immer wieder d Stilli
Mi allerbest Fründ
Für die chlyne Stückli Glück
Für ds zwöite Tassli ufem Tisch hie
U immer wieder d Stilli
Mi allerbest Fründ
Und o wes morn de scho so wit isch
U dr Fährimaa mi rüeft
Sägi i wär gärn no bitzli blibe
Aber i weiss du hesch viel z tüe
Also stigi i das Boot ii
U hocke dankbar ab im Dunkle
Näb emne achtjährige Bueb
Wo isch im Mittelmeer ertrunke