The provost's dochter wis walkin alaine,
O bit her luve it wis easy won,
Whan she heard a Scots prisoner a makin his mane
An she wis the flouer of Northumberlan
And it's "O, gin a lassie wad marry me?
O gin her luve it wis easy won,
A wad mak her a ladie o heich degree
E'er she'd lowse me out o' this prison sae strang."
An she's dune her ben tae her faither's bed stock,
O bit her luve it wis easy won,
An she's stolen the keys for a many brave locks,
Tae lowse him ben frae his prison sae strang.
An she's dune her ben tae her faither's stable,
O bit her luve it wis easy won,
An she's stolen the steed that wis baith fleet an able
Tae harry thaim ben tae bonnie Scotlan.
As thae were a ridin across the Scots muir
He said, "O bit yer luve it wis easy won.
Get doun frae my horse, ye're a brazen-faced hour,
Altho ye're the flouer o Northumberlan."
"For it's A hae my wife in my ain countrie,
O bit yer luve it was easy won,
An A cannae dae naethin wi a lassie like ye,
So ye'll need tae gae back tae Northumberlan."
"A cook in yer kitchen I shairly will be,
Altho my luve it wis easy won,
For A cannae gae hame tae my ain countrie,
Altho A'm the flouer o Northumberlan."
"A cook in my kitchen ye cannae weill be,
O bit yer luve it wis easy won,
For my ladie she winnae hae sairvants like ye
So ye'll need tae gae hame tae Northumberlan."
Bit laith wis he the lassie tae tine,
O bit her luve it wis easy won,
So he's hiret a horse an he's hiret an auld man
An he's sent her back hame tae Northumberlan.
Bit whan she gaed in her faither did fraun
An said, "O bit yer luve it was easy won,
Tae gang wi a Scotsman whan ye're barely fifteen,
An ye were the flouer o Northumberlan."
Bit whan she gaed in her mither did smile
An said "O bit yer luve it was easy won
But ye're nae the first that thon Scots hae beguilet
An ye're walcome back hame tae Northumberlan."
"Ye winnae want breid an ye winnae want wine,
O bit yer luve it was easy won,
An ye winnae want siller tae buy a man wi
An aye ye're the flouer o Northumberlan."