Binalikan ko ang mga lugar na dati nating pinupuntahan
Ang aklatan
Ang sinehan
Ang damuhan
Ang mahal nating paaralan
Sa isang hagdan
Hinanap ko ang baitang na dati kong sinulatan ng ating pangalan
Wala na siya ngayon
Nabura na ng mga paa
Ang tinta na pruweba na minsan din tayong umistambay ro'n
Bago na ang pintura ng mga dingding
Ang mga kahoy na pinto, ngayo'y gawa na sa salamin
May mga bagong tayong gusali
Pinalit sa mga nasunog at giniba
Naalala mo pa ba ang sinasabi mo noon?
Walang iniiwan ang panahon
Walang inaabandona ang oras
Bitbit niya tayo sa kanyang mga kamay
Sumusulong ang lahat
Gustuhin man natin o hindi
At ang nakaraan ay nanatiling nandiyan
Dahil lagi tayong nakalingon
Pwes, gusto kong mangawit ang iyong leeg
Gusto kong masdan mo ang lahat ng ito
Pero hindi, hindi pagsisi ang naririnig mo sa'king mga salita
Pero totoong hinahatak kita pabalik sa aking gunita
Misteryosong alaala
Hinahanap minsan ng isa ang matagal nang itanapon ng iba
Magdadahilan ako't sasabihing baka kasi may nawaglit akong detalye
Sa tingin ko'y may nabitiwan akong leksyon
At ayokong pakawalan ang kahapon
Kung ang ibig sabihin ay lilimutin ko kung sino ako noon
Paano ba kasi nangyari
Na noong mas mahina pa tayo ay saka pa tayo mas matapang?
Paanong mas ninamnam pa natin ang panonood sa mga paang papalayo
Kung mas mabigat pa noon ang mga paalam?
Paanong wala tayong pakialam
Kung maputikan ang mga sapatos kung tutungo tayo sa minamahal?
Paanong samantalang ngayon
Kung may nagbabadyang ulan ay ni ayaw nating lisanin ang ating mga tahanan?
Matatawag mo pa ba itong tahanan?
Ilang pahid ng pintura?
Ilang pintong napalitan?
Ilang damuhang naging sementadong daan?
Ilang bagong gusali ang kailangan niyang pagdaanan
Bago mo masabing hindi na ito ang kanlungang kinamulatan?
At anong lakas ng loob nating hingin sa kanya na h'wag magbago
Gayong ilang beses na tayong nag-iwan ng lumang balat sa kanyang aspalto?
At kailan ka pa pinaliit ng pagmamahal?
Kailan mo isinauli ang libro?
Lukot ang pabalat
Pilas ang ilang pahina
Walang bulaklak na nakaipit
Sa paborito niyang tula